నిరంతర మథనం

[శ్రీ పెద్దాడ సత్యప్రసాద్ రచించిన ‘నిరంతర మథనం’ అనే కవితని పాఠకులకి అందిస్తున్నాము.]

[dropcap]నా[/dropcap] మనసు ఓ గాలిపటం
నా చేతిలో దారం ఉన్నా ఫలితం సున్నా
దానికి అవని తప్ప అవధులు లేవు
ఎల్లలు కల్లలు ఎరగని గని అది
హిమ శిఖరాలను చుంబిస్తుంది
పాతాళాలను స్పృశిస్తుంది
దానికి వయసు లేదు వరస లేదు
ఎక్కడికైనా పోతానంటుంది
ఆ పోయింది తాను పోక
ఈ జీవున్నీ రమ్మంటోంది
అక్కడే వస్తోంది కదా సమస్య
మనసు వెళ్ళిన ప్రతీ చోటకీ
మనిషి వెళ్ళలేడు కదా
ఆ సంగతి దానికి అనవసరం
నీ కట్టుబాట్లు కట్టి పెట్టు అంటుంది
గద్దిస్తుంది పెద్ద నోరు చెస్తుంది
ఆ నస భరించడం మహ కష్టం
కాని పసిదాని లాంటి దానిని
చూస్తే భలే ఇష్టం
ఏ ఆధారం లేని ఈ గాలి పటం
ఏ కొమ్మకో చిక్కుకోకుండా
ఏ ముళ్ళ కంపనో రక్కుకోకుండా
కాపాడడమే నా నిత్య కృత్యం
అయినా ఇదొక మహ యజ్ఞం
నిరంతర మథనం
మనసు ప్రశ్నకు ఎప్పటికీ
దొరకని సమాధానం