[box type=’note’ fontsize=’16’] “శివుడు అసత్యం కాదు. మిథ్య ఎంతమాత్రం కాదు. అన్నింటికీ మించిన నిజం. మహాప్రళయానంతరం మానవులకు, నాగరికత వికాసానికి గొప్ప మార్గం చూపించేవాడు ఈశ్వరుడు” అంటున్నారు కోవెల సంతోష్‌కుమార్ ఈ వ్యాసంలో. [/box]
[dropcap]శి[/dropcap]వుడు.. మహాదేవుడు.. భారతీయులకు సంబంధించినంతవరకు ప్రత్యక్షదైవం. నిరంతరం మన మధ్యే తిరుగాడే దేవుడు. ఖగోళ మండలంలో ఉన్న నగరాల నుంచి భూమికి దిగివచ్చి మనుషులను ఉద్ధరించిన దేవుడు. మనం పూజించే దేవతలకు ఆయన నాయకుడు. అనంతమైన మంచితనానికీ.. అసాధారణమైన వినాశనానికి శక్తిరూపం ఈ శివుడు. ఆయన చేతిలో త్రిశూలం ఆయుధంగా ఉంటుంది. ఆయన దారిలో ఏది అడ్డం వచ్చినా విధ్వంసం చేస్తుంది. భారతీయ సంప్రదాయంలో సృష్టి జరుగాలంటే.. ముందుగా వినాశనం జరగాలన్నది విశ్వాసం. లయకారకుడైన శివుడు ప్రళయాన్ని సృష్టించి వినాశనం చేస్తాడు. ఆ తర్వాత ప్రకృతిపురుషులైన ఆదిదంపతుల (శివపార్వతులు) ద్వారా పునఃసృష్టి జరుగుతుందని విశ్వాసం. ఈ భూమండలంలో మనుషులను, సమస్త జీవజాలాన్ని ఆకాశంలోని లోకాల్లో ఉన్న అనేకమంది జన్మించింది దేవీదేవతల అనుగ్రహం వల్లనేనని హిందువులు విశ్వసిస్తారు. ఇది నిజమేనా? భూమిపై జీవజాలం సృష్టికి.. మానవ పరిణామ వికాసానికి ఇతర గ్రహాల్లో ఉన్న జీవులు సహాయం చేశారా? వాళ్లలో ఎవరీ శివుడు.. రకరకాల పేర్లతో పూజించే ఈయన నిజంగా దేవుడా? లేక పాశ్చాత్యులు, ఖగోళ శాస్త్రవేత్తలు భావించే గ్రహాంతరవాసా? నిజంగా దేవతలు మనుషులకు సహాయపడ్డారా? అదే నిజమైతే మానవలోకం భవిష్యత్తు శివుడిపై ఆధారపడి ఉందా? అనేక ప్రశ్నలు.. వాటికి సమాధానాలు ఏమిటి? శివుడి స్వరూప స్వభావాలపై.. విశ్వాసాలపై.. చరిత్రపై ఇతరుల పరిశోధనలు శాస్త్రీయపరమైన విశ్లేషణలు చేస్తున్నాయి. సో కాల్డ్ హేతువాదులెవరూ నమ్మని వేదాల నుంచి.. రకరకాల పురాణాలు.. ఇతిహాసాలు.. ఫిలాసఫర్ల రచనలన్నింటి మదింపు ఇప్పుడు జరుగుతున్నది. లక్షలకొద్దీ పేజీల రచనలు ఉన్నాయి. వందలు వేల సంవత్సరాలుగా మౌఖికంగా కొనసాగుతూ వచ్చిన సాహిత్యం ఉన్నది. ఈ సాహిత్యమంతా చెప్పింది ఏమిటి? అందులోని హేతుబద్ధత ఎంత? ప్రపంచంలోని ఇతర సంస్కృతులు, ధర్మాలు చెప్తున్నదేమిటి? వీటన్నింటిపైనా విస్తృత పరిశోధన జరుగుతున్నది.
భారతదేశం.. దాదాపు 20 లక్షల చదరపు మైళ్లు ఉన్న దేశం. ప్రపంచంలో ఏడవ అతిపెద్ద విస్తీర్ణం గలిగిన దేశం. దాదాపు 150 కోట్ల మందితో ప్రపంచంలోనే రెండో అతి పెద్ద జనాభా కలిగిన దేశం. ప్రపంచంలోనే అతి పురాతనమైన నాగరికత కలిగిన దేశం మనది. ఇక్కడ పుట్టిన సాహిత్యమైనా, పురాణమైనా, ఇతిహాసమైనా.. తొట్టతొలిదైన వేదమైనా.. మనిషితో, మట్టితో, పంచభూతాలతో సంబంధం లేకుండా లేవు. భారతీయధర్మం ప్రకారం దేవతలు మిథ్య కాదు. వాళ్లు ఖచ్చితంగా ఉన్నారు. పిలిస్తే వస్తారు. కనిపిస్తారు. సహాయం చేస్తారు. పాశ్చాత్య దేశాల్లోని మత ధర్మాల కంటే.. భారతదేశంలో దేవతల పట్ల విశ్వాసం అత్యంత బలమైనది. భూమికి పైన ఏడు లోకాలు ఉన్నాయి. ఈ లోకాల నుంచి దేవతలు లేదా గ్రహాంతరవాసులు భూమ్మీదకు దిగివస్తారని చెప్తారు. మనకు ఇతిహాసాలున్నాయి. ఇవి మనకు చరిత్రే కానీ.. మిథ్య కాదు.. కథో.. కవనమో కాదు. మన దగ్గరే కాదు.. యూదు-క్రైస్తవ ధర్మాల్లో కూడా దేవుడు.. లేదా ఇతరలోకాల నుంచి వచ్చిన జీవులు మనకంటే ఎంతో శక్తిమంతులు.. సమర్థులు. వేదాల ప్రకారం దేవతలు వాళ్ల లోకాల నుంచి మనకు తమ టెక్నాలజీని ట్రాన్స్‌ఫర్ చేశారు. ప్రాచీన ఖగోళశాస్త్ర సిద్ధాంతకర్తలకు ఒక సందేహం వచ్చింది. ఈ మతపరమైన గ్రంథాల్లో జరిగిన చర్చంతా దైవసంబంధమైనదేనా? లేక గ్రహాంతరవాసులతో మనిషికి సంబంధాలను కూడా చెప్తున్నాయా? అని.. అభివృద్ధి చెందిన పాశ్చాత్యదేశాలన్నీ గ్రహాంతరవాసులున్నారనే కాన్సెప్ట్‌ను బలంగా నమ్ముతాయి. అదే సిద్ధాంతాన్ని కాస్త డిఫరెంట్‌గా భారతదేశం దేవతలుగా, దైవత్వంగా విశ్వసిస్తుంది.
మహాభారత ఇతిహాసాన్ని భారతీయ ధర్మం పంచమవేదమని చెప్తుంది. ఇందులో మనకు ఎగిరే విమానాల ప్రస్తావన ఉన్నది. అంతకుముందు రామాయణ కాలంలోనే రావణుడు విమానాన్ని వాడాడు. విమాన మరమ్మతు కేంద్రం నిర్మించాడు. ప్రత్యేక విమానాశ్రయం నిర్మించాడు. హనుమంతుడు లంకకు వెళ్లినప్పుడు ముందుగా కాల్చింది ఈ రవాణా వ్యవస్థనే. ఇప్పటికీ లంకలో దీని ఆనవాళ్లు మనకు స్పష్టంగా కనిపిస్తాయి. మహాభారతంలో కూడా మనకు ఎగిరే విమానాల ప్రస్తావన ఉన్నది. వాయిస్ యాక్టివేటెడ్ వెపన్స్ (ధ్వని ప్రకంపనలు సృష్టించే ఆయుధాలు) కూడా వాడినట్లు కనిపిస్తుంది. న్యూక్లియర్ ఆయుధాలలో నాగరికతల ధ్వంసం జరిగినట్లు మహాభారతం ద్వారా తెలుస్తుంది. మహాభారతంలోనే మరో ప్రస్తావన కూడా కనిపిస్తుంది. భూమికి అన్ని వైపులా పెద్ద పెద్ద నగరాలు ఉన్నాయని ఈ నగరాల నుంచి చిన్న చిన్న వాహనాల ద్వారా భూమి మీదకు రాకపోకలు జరిగినట్లుగా తెలుస్తుంది. ఆ రోజుల్లో స్పేస్‌షిప్ అన్న పదం లేదు. అందుకే మనవాళ్లు వాటిని నగరాలు అని ఉండవచ్చు ఈ వాహనాలను విమానాలుగా పేర్కొన్నారు. వీటి తయారీపై ఒక శాస్త్ర గ్రంథాన్నే రాశారు. ఈ విమానాల ద్వారా భూమ్మీదకు వచ్చినవారు ఇక్కడి మనుషులకు టీచర్లుగా వ్యవహరించారు. విజ్ఞానాన్ని అందించారు. గ్రహాంతరాళాల నుంచి భూమ్మీదకు జరిగిన రాకపోకలకు మార్గదర్శనం చేసింది శివుడు. దేవతలు కానీ, దేవదూతలు కానీ భూమి మీదకు వచ్చి తిరిగి వెళ్లేందుకు భగభగ మండే విమానం ద్వారా భూమ్మీదకు వచ్చి వెళ్లారు. మన దేవతలందరిలో నటరాజమూర్తి అయిన శివుడికి నటరాజ రూపంలో చుట్టూ కనిపించే జ్వాలావలయాలు ఈ విమానానికి ప్రతీక. ఈ చిదంబర రహస్యాన్ని ఛేదించడం అంత తేలికైన విషయం కాదు. దేవుడికి రూపం కల్పించింది నిస్సందేహంగా మనిషే అయినప్పుడు అతని ఊహకు ఆ రూపం ఎలా తట్టింది? కల్పనకు కూడా ఏదో హేతువు ఉంటుంది. ఈ ఆలోచనను అందుకుని ముందుకు వెళ్తే సమాధానం దొరకవచ్చేమో. శివుడి గురించి సంభావించేప్పుడు ప్రధానంగా ఆయన రూపం కనిపిస్తుంది. ఆ తర్వాత ఆయన చేతిలో ఉండే త్రిశూలం.. ముక్కోటి దేవతల్లో ఆయనకు మాత్రమే కనిపించే మూడో నేత్రం.. ఎవరికీ అంతుపట్టకుండా ఉన్న ఆయన నివాసమైన కైలాసం.. దేవతలందరిలో ఆయనకు మాత్రమే ఉన్న మరోరూపం శివలింగం.. ప్రళయకారుడైన ఆయన చేసే లయ విన్యాసం.. ఆయనలోని అర్ధనారీశ్వర తత్వం.. అన్నీ ప్రత్యేకతలే..
శివ రహస్యం
శివుడిని మహాదేవుడని కూడా పిలుస్తారు. మహాదేవుడంటే గ్రేట్ గాడ్ అని అర్థం. అంటే దేవతలకే దేవుడని అర్థం. అందరిలోనూ అత్యంత శక్తిమంతుడు శివుడు. ఆయన ప్రధాన విధి లయించడం. సృష్టి నశించకపోతే పునఃసృష్టి సాధ్యంకాదు. అది శివుడివల్లనే జరుగుతున్నది. ఎలా చెప్పగలుగుతున్నాం? భారతీయ ధర్మంలో దేవతల స్వరూప స్వభావాల వెనుక పెద్ద ఫిలాసఫీయే దాగుంది. సృష్టి నిర్మాణ, వికాస పరిణామాలతో దేవతలకు సంపూర్ణమైన భాగస్వామ్యం ఉన్నది. నిరాకార, నిరంజనుడైన పరమేశ్వరుడికి ఆయన స్వభావోక్తమైన స్వరూపాన్ని కలిపించారు. శివుడిలో.. అగ్ని ఉన్నది (మూడో కన్ను). ఆకాశమున్నది (నెలవంక), నీరున్నది (గంగ), మనిషి కలిసిపోయే మట్టి లోనే ఆవాసమున్నాడు. గాలిని ఆహారంగా తీసుకొనే పాములను మెడలో వేసుకొన్నాడు. జంతు చర్మాన్ని ధరించాడు. శ్మశానవాసి అయి తానే లయకారుడయ్యాడు. ప్రకృతి పురుషుల మమేకంతో అర్ధనారీశ్వరుడై.. దాంపత్య ధర్మానికి ఆదిగా నిలిచి సృష్టి నిర్మాణ కార్యాన్ని నిర్వహించాడు. ఆయన చేతిలోని ఢమరు ధ్వనిని పుట్టించింది. త్రిశూలం మన శరీరంలోని ఇడ, పింగళ, సుషుమ్న నాడులకు ప్రతీకాత్మకమైంది. అత్యంత శక్తిమంతమైనది. ఒక్కమాటలో చెప్పాలంటే విశ్వం (యూనివర్స్) లోని అన్ని ఎలిమెంట్స్ మనకు శివుడిలో కనిపిస్తాయి. అందుకే ఆయన్ను మహాదేవుడన్నారు.
శివుడి చేతిలోని డమరు నాదంతో సృష్టి నిర్మాణం జరుగుతుందని భారతీయ ధర్మం చెప్తుంది. ఆయన చేతిలోని త్రిశూలం సృష్టిని లయం చేస్తుంది. ముక్కోటి దేవతల్లో శివుడికి మాత్రమే మూడో కన్ను ఉన్నది. ఇది అగ్నిస్థానం. జ్ఞానానికి ప్రతీక. మనిషిలోని పీనియల్ గ్లాండ్సే మూడోకన్ను అని కూడా అంటారు. ఈ కన్ను తెరిస్తే దానికి కనిపించే ప్రాంతమంతా భస్మమైపోవలసిందే. దక్షిణ భారతదేశంలోని చిదంబరంలోని నటరాజమూర్తి రూపం శివుడి చుట్టూ జ్వాలావలయాలు ఉన్నట్లు కనిపిస్తుంది. ఈ రూపాన్ని చూసిన ఆస్ట్రోనాట్ శాస్త్రవేత్తలు ఈ రూపం వెనుక ఉన్న వాస్తవాన్ని కనుగొనేందుకు ప్రయత్నించారు. శివుడి ఈ రూపాన్ని చిత్రించిన.. లేక శిల్పీకరించిన మన ప్రాచీనులు జ్వాలా వలయాలను ఎందుకు పెట్టారు. ఇదేమైనా భగభగమండే విమానమా? ఇలాంటి ఏదైనా వాహనంలో శివుడు భూమ్మీదకు వచ్చాడా? దీన్ని మనవాళ్లు చూసి చిత్రించారా? నటరాజమూర్తి రూపం ఎలా ఆవిష్కారమైంది? దీనికి ఇప్పటివరకూ విస్పష్టమైన సమాధానమైతే దొరకలేదు. ఇక్కడ ఉన్న స్వామి ఆకాశలింగం. ప్రపంచంలో నిరాకారుడిగా, శూన్యంగా ఉన్న శివుడి రూపం ఇక్కడ మాత్రమే మనకు కనిపిస్తుంది. దాని పక్కనే మనకు నటరాజమూర్తి ఉంటారు. ఆకాశ లింగానికి, నటరాజమూర్తికి మధ్య కార్యకారణ సంబంధం దేన్ని సూచిస్తున్నది? ఆకాశ లింగం శూన్యరూపం. నటరాజమూర్తి చుట్టూ ఉన్న జ్వాలలు స్పేస్‌క్రాఫ్ట్‌ను ప్రతిబింబిస్తున్నాయి. రోదసి నుంచి ఈ స్పేస్‌క్రాఫ్ట్‌లో ఈశ్వరుడు భూమ్మీదకు వచ్చివెళ్లాడు. ఇతర దేవతలు.. దేవదూతలు ప్రత్యేక విమానాల్లో భూమ్మీదకు రాకపోకలు సాగించారు. మానవులకు అసాధారణమైన విజ్ఞానాన్ని అందించి వెళ్లారు. ఇందుకు ఉదాహరణలు మనకు కొల్లలుగా కనిపిస్తాయి. మనదేశంలోనే అత్యంత అద్భుతమైన దృష్టాంతాలు కన్పిస్తాయి. వాటిలో ఒకటి భౌమాస్త్రం.
భౌమాస్త్రం
భారతదేశం.. ఔరంగాబాద్ జిల్లా.. ప్రసిద్ధమైన ఎల్లోరా గుహలు.. ఆధునిక మానవులకు అత్యాధునిక సాంకేతిక పరిజ్ఞానాన్ని దేవతలు అందించారనడానికి నిలువెత్తు సాక్ష్యమిది. ఎల్లోరా గుహలు, సొరంగాలు ఇవాల్టికీ ఎవరికీ అంతుపట్టని రహస్యాలుగానే ఉన్నాయి. ముంబై నగరానికి ఈశాన్యం వైపున దాదాపు 200 మైళ్ల దూరంలో ఉన్న అత్యద్భుతమైన దేవాలయ సముదాయమిది. సుమారు మైలు పొడవున విస్తరించి ఉన్న 34 ఆలయాలు చాలా ప్రాచీనమైనవి. ప్రస్తుత రూపంలో మనకు కనిపించే ఆలయాలు క్రీస్తుశకం 600 నుంచి క్రీస్తుశకం 1000 మధ్యలో నిర్మించినట్లు ఇప్పటి చరిత్రకారులు భావించినప్పటికీ వీటి అసలు నిర్మాణం అంతకు ముందు ఎన్నో ఏండ్లకు ముందు జరిగిందని ఖగోళశాస్త్రవేత్తలు చెప్తున్నారు. ఈ ఎల్లోరా గుహల్లో 16వ గుహను కైలాస్ దేవాలయంగా పిలుస్తారు. ఈ ఆలయంలో అత్యంత భారీ శివుడి విగ్రహం మనకు కనిపిస్తుంది. సుమారు మూడంతస్థుల ఎత్తులో.. ఏథెన్స్ లోని పార్థెనాన్ విగ్రహానికి రెండింతలు ఎత్తున ఈ విగ్రహం ఉంటుంది. నిలువెత్తు కొండను పై నుండి కిందకు చెక్కుతూ విగ్రహాన్ని రూపొందించినట్లు విగ్రహ నిర్మాణాన్ని చూస్తే అర్థమవుతుంది. ఈ ఆలయ నిర్మాణానికి దాదాపు నాలుగు లక్షల టన్నుల రాతిని పగులగొట్టి తొలగించాల్సి వచ్చిందని చరిత్రకారులు అంచనావేశారు. పురాతత్వ శాస్త్రవేత్తల నిర్ధారణ ప్రకారం ఎల్లోరాలోని కైలాస ఆలయాన్ని 18 సంవత్సరాలలో నిర్మించారు. ఆధునిక కాలంలో ప్రతిరోజూ 12 గంటలు ఎలాంటి విరామం లేకుండా 18 సంవత్సరాలు పనిచేస్తే కేవలం 1 లక్ష టన్నులకు మించి రాయిని తొలగించడం సాధ్యం కాదు. అంటే గంటకు ఐదువేల కిలోలు మాత్రమే తొలగించవచ్చు. కానీ, 4 లక్షల టన్నుల రాయిని తొలగించడం ఎలా సాధ్యమైంది? ప్రస్తుత చరిత్రకారులు చెప్పినట్లే వెయ్యేండ్ల క్రితం కైలాస దేవాలయం 18 ఏండ్లలో నిర్మించినట్లయితే.. ఎంతో కష్టపడి ఆ నాలుగు లక్షల టన్నుల రాయిని తొలగించారనే అనుకుందాం.. కానీ ఆ రాయి అంతా ఎక్కడో ఒకచోట శిథిలాలుగానైనా కనిపించాలి కదా? చుట్టుపక్కల వందల కిలోమీటర్ల దూరంలో అలాంటి ఆనవాళ్లు లేవు.
ఈ రాయిని సమీపంలోని మరేదైనా నిర్మాణానికి వినియోగించారా అంటే అందుకు సంబంధించిన ప్రతీకలు కూడా ఏవీ కనిపించడంలేదు. పోనీ ఇది సహజంగా ఏర్పడిన నిర్మాణమా అంటే కానే కాదు. స్పష్టంగా మానవ నిర్మితమేనని పురాతత్వ శాస్త్రవేత్తలు, చరిత్రకారులు, నిర్మాణరంగ నిపుణులు తేల్చిచెప్పారు. మరి ఈ రాతి తొలగింపు ఎలా సాధ్యపడింది? రాతి గుహను తవ్వుతున్నప్పుడు రాయి ధూళిగా మారిపోయి ఉండాలి.. దీనిపై మరింత లోతుగా పరిశోధన చేసినప్పుడు వేదాలలో ఒక శక్తిమంతమైన పరికరం గురించిన ప్రస్తావన ఉన్నది. ఇది ఒక హైటెక్ మెషిన్. దీనిపేరు భౌమాస్త్రం. మహాభారత కాలంలో కూడా ఈ అస్త్రాన్ని వినియోగించినట్లు తెలుస్తుంది. ఇది రాతిని డ్రిల్ చేసుకుంటూ వెళ్తుంది. డ్రిల్ చేస్తున్నప్పుడే రాతిని ధూళిగా మార్చి గాలిలో కలిపేయగలదు. కైలాస ఆలయ నిర్మాణంలో ముఖ్యంగా గుర్తించాల్సింది రాతిని తొలిచే పని పై నుంచి కిందకు సాగింది. అంటే డ్రిల్లింగ్ జరిగిందనేది స్పష్టం. ఈ అస్త్రం గురించి వేద రచనల్లో చాలాసార్లు ప్రస్తావించారు. ఇది రాతిని మాత్రమే కాదు.. గనుల తవ్వకాలలో కూడా దీన్ని వినియోగించారు. వేల సంవత్సరాల క్రితమే కైలాస ఆలయ నిర్మాణానికి భౌమాస్త్రాన్ని వినియోగించారనే ఆస్ట్రోనాట్ సిద్ధాంతకర్తలు స్పష్టంచేస్తున్నారు.
కైలాస ఆలయంలో మనం మరింత ప్రముఖంగా గుర్తించాల్సింది పెద్ద పెద్ద సొరంగాలు. కొన్ని సొరంగాలు చిత్రవిచిత్ర కోణాల్లో కనిపిస్తాయి. ఇంకొన్ని సొరంగాలు నలభై అడుగుల లోతువరకు ఉన్నాయి. కైలాస ఆలయం కింద పెద్ద సొరంగం ఉన్నది. స్థానిక అధికారులు ఇప్పుడు ఈ సొరంగాన్ని మూసివేశారు. కానీ కైలాస ఆలయం కింద సొరంగాలు నిర్మించాల్సిన అవసరం ఏమొచ్చింది? ఇంతకీ ఆ సొరంగంలో ఏమున్నది? 1876వ సంవత్సరంలో బ్రిటన్‌కు చెందిన ఆధ్యాత్మికవేత్త ఎమ్మా హార్డింజ్ బ్రిట్టెన్.. ‘ఘోస్ట్ ల్యాండ్’ అన్న పుస్తకాన్ని రాశారు. అందులో ఈ రహస్య సొరంగం గురించి ఆమె విస్తారంగా చర్చించారు. ఆమె కేవలియర్ లూయీ అనే వ్యక్తితో మాట్లాడినప్పుడు అతను ఎల్లోరాలోని ఈ రహస్య సొరంగం గురించిన వివరాలు చెప్పినట్లు ఆ పుస్తకంలో పేర్కొన్నారు. ‘ఎల్లోరాలోని ఈ రహస్య సొరంగంలోకి లూయీ ప్రవేశించినప్పుడు అక్కడ కొన్ని ప్రత్యేకమైన జీవరాశులు కనిపించాయి. అక్కడ అండర్‌గ్రౌండ్ చాంబర్ ఉన్నది. దాన్ని ఓపెన్ చేయగానే ఎదురుగా అతిపెద్ద అత్యున్నత వేదిక కనిపించింది. దానిపై పెద్ద పెద్ద లోహరాతి వేదికలు శక్తిమంతమైన బ్యాటరీల సహాయంతో చార్జింగ్ అవుతూ వెలుగులు విరజిమ్ముతున్నాయి. అక్కడున్న ఏడు రాతి ఆసనాలపై ఏడుగురు కూర్చొని ఉన్నారు. మధ్యలో ఉన్నవారు మాత్రం అస్పష్టంగా ఉన్నారు. ఆయన శరీరం ప్రకాశిస్తున్నది. భౌతిక కాల ప్రాంతాలకు అతీతంగా ఆయన ఆకృతి వెలుగొందుతున్నది. ఆయన మాట్లాడుతున్నాడు. ఎవరీయన? మహేశ్వరుడు స్వయంగా అక్కడ ఆవాసం ఏర్పరుచుకున్నారా? రోదసిలోని తన లోకాల నుంచి ఆయన ఈ ప్రాంతంలోకి వచ్చివెళ్తున్నారా? అలా కాకపోతే ఆలయం కింద అంత విస్తారమైన సొరంగాలను ఎందుకు తవ్వారు? పెద్ద పెద్ద గదులను ఎందుకు నిర్మించారు. ఈ సొరంగాలను ఒకరకంగా ప్రాచీన నగరాలుగా భావించవచ్చా? వేల సంవత్సరాల క్రితం గ్రహాంతర వాసులు.. లేదా దేవతలకు భూమిపై ఇవి ఆవాసాలుగా ఉపయోగపడ్డాయా? అంటే అవుననే అంటున్నారు ఆస్ట్రోనాట్ శాస్త్రవేత్తలు. భూమిపై మహా ప్రళయాన్ని సృష్టించినప్పుడు మహాదేవుడు ప్రజలను ఈ సురక్షిత సొరంగాల్లోకి తరలించి రక్షించాడా? ఈ ఆలయాన్ని ప్రస్తుత చరిత్రకారులైతే వెయ్యేండ్ల క్రితం కట్టినట్లుగా భావించడమే తప్ప స్పష్టమైన తేదీకి ఎలాంటి ఆనవాళ్లు లేవు. ఇలాంటి ఆలయాలు, సొరంగాలు మన దేశంలోనే కాదు.. ప్రపంచంలోని చాలా ప్రాంతాల్లో కనిపిస్తాయి. ప్రధాన స్రవంతిలో ఉన్న పురాతత్వ శాస్త్రవేత్తలు చెప్పేదానికన్నా ఇవన్నీ చాలా ప్రాచీనమైనవి. వాటికి వినియోగించిన యంత్రాలు, అస్త్ర శస్త్రాలు అంతకంటే ప్రాచీనమైనవి. వాటి శక్తి అనంతమైంది. వాటి రూపకర్త ఆదిదేవుడు. ఇందులో సందేహం అక్కర్లేదు.
శివలింగం
మహాదేవుడిలో మనకు ప్రధానంగా కనిపించేది.. మిగతా దేవతలెవరిలోనూ కనిపించని రూపం శివలింగం. ముక్కోటి దేవతల్లో ఎవరికీ ఇలాంటి రూపం లేదు. ఈ రూపంలో శివుడిని కొలవడం లేదు. మహాశివరాత్రిని లింగోద్భవ దినంగా ప్రత్యేకంగా పూజాదికాలు చేస్తారు. గోళాకారంలో ఉండే శివలింగం.. ప్రత్యేకంగా ఉండే ఆధారభూమికపై స్థిరపడి ఉంటుంది. భారతదేశంలోనే కాదు, ఆగ్నేయాసియా, తూర్పు ఆసియా అంతటా శివలింగాలు మనకు కనిపిస్తాయి. చైనా, జపాన్లలో కూడా శివలింగాలు దర్శనమిస్తాయి. దాదాపు రెండువేల సంవత్సరాలకు పూర్వం శివలింగం మొదట కనిపించినట్లు పాశ్చాత్య శాస్త్రవేత్తలు చెప్తారు కానీ, ఇది అంతకుముందు వేల ఏండ్ల నాటి నుంచే మన దగ్గర పూజలందుకొంటున్నది. మన దేశంలో ఆయా దేవతాలక్షణాలకు తగినట్టు రూపలావణ్యాలు ఏర్పడ్డాయి. కానీ.. శివుడికి మాత్రం ఒక ఎక్స్‌ట్రా రూపం.. అదీ కన్నూ.. ముక్కూ… చెవీ.. కాళ్లూ చేతులూ లేని రూపం. ఒక రాయి. నదీ గర్భంలో నీళ్లలో నాని నాని నున్నగా గోళాకారంలో కనిపించే పెబ్బెల్స్ టైప్ రాయిలా ఉంటుంది. జనరల్‌గా ఓవెల్ షేప్‌లో ఉండే ఈ రాయి స్థిరంగా నిల్చోడానికి ఓ బేస్‌మెంట్.. అదికూడా వాటర్ పోస్తే బయటకు వెళ్లిపోయేలా కాలువ మాదిరి నిర్మాణం. నిరంతరం దీన్ని అభిషేకించడానికి పైన ప్రత్యేక ఏర్పాటు.. పైనున్న రాతి రూపానికి శివలింగమని పేరు. కింద ఉన్న బేస్‌కు పానవట్టమని పేరు. శివుడికి దీనికి ఉన్న సంబంధం ఏమిటి? శివుడికి ఆల్రెడీ ఒక రూపం ఉన్నప్పుడు ఆ రూపంలో విగ్రహాలు ఉండకుండా లింగరూపంలో ఆరాధించడమేమిటి? పోనీ శివలింగాన్ని అచ్చంగా శివుడికి మాత్రమే ప్రతిరూపంగా ఆరాధిస్తున్నారా? అంటే అదీలేదు. శివలింగాన్ని శృంగారానికి.. కామానికి ప్రతీక అని నిర్వచించారు. అది మనందరి మెదళ్లలోకి చెరిగిపోని విధంగా ఎక్కించారు. ఈ భావనపైనే విశ్వసనీయతను పెంచుతూ వచ్చారు. నిజంగా శివుడికి ప్రతిరూపమని శివలింగాన్ని సంభావించినప్పుడు ఆ ప్రతీకాత్మకతకు నిర్వచనం మరోవిధంగా ఉండాలి? కానీ ఆ విధంగా నిర్వచించలేదు. శివలింగాన్ని శివుడికి ప్రతిరూపంగా చెప్తూనే.. దాన్ని పూర్తిగా శృంగారానికి ప్రత్యక్షప్రతీకగా చెప్తూ వచ్చారు. శివలింగాన్ని, పానవట్టాన్ని పురుష స్త్రీ ఆర్గాన్లుగా విస్తృతంగా నిర్వచించి సృష్టి నిర్మాణ కార్యానికి గుర్తులుగా రెండున్నర వందల సంవత్సరాలుగా ప్రచారం జరిగింది. ఈ రకమైన ఇంటర్‌ప్రెటేషన్‌కు ఎక్కడైనా ఆధారం ఉన్నదా? ఆయా లక్షణాల ప్రకారమే దేవతలకు రూపాలను కల్పించారని భావించినట్లయితే, మనకున్న ముక్కోటి దేవతల్లో శృంగారానికి, ప్రేమకు ప్రతిరూపాలుగా స్పెషల్‌గా రతీ మన్మథులున్నారు. శివపార్వతులను కలిపింది కూడా వాళ్లే. యూనివర్సల్ ప్రేమకు అస్తిత్వ రూపాలుగా ఆ ఇద్దరు ఉన్నప్పుడు.. శక్తి లయకారకులైన ఆదిదంపతులకు ప్రతిరూపంగా శివలింగానికి పునర్నిర్వచనం ఎక్కడి నుంచి వచ్చింది? ఎలా వచ్చింది? ఎవరు ఈ విధంగా నిర్వచించారు?
ఆదిదేవుడైన పరమేశ్వరుడు పురుషుడై.. ఆదిశక్తి అయిన అమ్మ పార్వతి ప్రకృతి స్వరూపంలో మూర్తిమంతమై అర్ధనారీశ్వరతత్తానికి ఉనికి అయి.. ఆది దంపతులుగా కొలువుదీరినప్పుడు.. శివలింగానికి చేసిన ఈ ప్రతీకాత్మక భావన వెనుక అభ్యంతరం చెప్పడానికి ఏమున్నదన్న ప్రశ్న ఉద్భవించడం వాస్తవమే. ప్రకృతి పురుషుల కలయిక ఈ సమస్త సృష్టికి ఆధారభూతమైనదన్న వాదన పై అభ్యంతరాలు వ్యక్తం చేయాల్సిన అవసరం లేదు. ఎందుకంటే సైన్స్ కూడా ఈ సిద్ధాంతాన్ని అంగీకరిస్తుంది. సమస్తమైన ప్రకృతి స్త్రీ రూపమైనప్పుడు.. ప్రత్యక్షనారాయణుడైన సూర్యుడు పురుషుడై కిరణజన్య సంయోజక్రియ ద్వారా ఈ సమస్త సృష్టివికాసం జరుగుతున్నది. హేతువాదులకూ ఈ విషయంలో భిన్నాభిప్రాయాలుండే అవకాశంలేదు. ఈ ప్రకృతి పురుషుల ఏకాత్మ భావనకు శివలింగానికి సంబంధం ఏమిటి?
ఒకవేళ శివలింగాన్ని ఇన్నేండ్లుగా ప్రచారం చేసినట్టు శృంగారానికి ప్రతీకగానే ఒక్క క్షణం భావించినట్టయితే.. ఆ లింగానికి నిరంతర జలాభిషేకం చేయడం దేనికి? శివలింగానికి పైభాగాన ప్రత్యేకంగా ఏర్పాటుచేసిన పాత్ర ద్వారా అఖండ జలాభిషేకం ఎందుకు చేస్తారు. శృంగారానికి ప్రతీక అయినప్పుడు జలాభిషేకం దేనికీ గుర్తు? శివుడు అభిషేక ప్రియుడు అని అనుకొన్నప్పుడు శివుడి మూర్తరూపానికి అభిషేకం చేయవచ్చు. కానీ సంపూర్ణ వ్యక్తిరూపంలో ఉన్న శివుడికి నిత్యాభిషేకం చేస్తున్న దాఖలాలు మనకు సాధారణంగా కనిపించవు. శివలింగానికి మాత్రమే అభిషేకం తప్పనిసరి. శివలింగాన్ని.. పానవట్టాన్ని ఏకత్రితం చేసి చూసినప్పుడు అక్కడ శివపార్వతులు ఇరువురూ.. అంటే స్త్రీ పురుషులు.. ఇద్దరూ ఉన్నట్టే కదా.. అంటే శివుడితోపాటు అమ్మకు (పార్వతి) కూడా అభిషేకం చేసినట్టే కదా. అంటే.. పార్వతీదేవి కూడా అభిషేక ప్రియురాలా? సాధారణంగా ఇతర దేవతలకు అభిషేకం చేసినప్పుడు అభిషేక జలాన్ని తీర్థంగా స్వీకరిస్తారు. కానీ శివలింగానికి అభిషేకం చేసిన జలాన్ని తీర్థంగా స్వీకరించరు. విడిగా వదిలిపెడతారు. ఎందుకు? శివలింగంలోనే ఆదిదంపతులు ఒకటిగా దర్శనమిస్తున్నప్పుడు ఆలయాల్లో పార్వతీదేవి పలు రూపాల్లో విడిగా ఎందుకు దర్శనమిస్తుంది?
కాస్మిక్ క్రియేషన్ అండ్ అడ్మినిస్ట్రేషన్‌లో మనకు త్రిమూర్తి కాన్సెప్ట్ బలంగా కనిపిస్తుంది. త్రిమూర్తితత్వం అనేది సృష్టి నిర్మాణ నిర్వహణ వ్యవస్థ. మన ప్రజాస్వామ్య వ్యవస్థలో శాసన, కార్యనిర్వాహక, న్యాయ వ్యవస్థలకు ఈ త్రిమూర్తి తత్త్వమే మూలం. ఇందులో బ్రహ్మ సృష్టిని నిర్మించేవాడు అయితే, విష్ణువు పరిపాలించేవాడు. లయకారుడు మహాదేవుడు. విశ్వమంతా ఈశ్వరుడిని ఈ విధంగానే దర్శిస్తుంది. కొలుస్తుంది. శివుడు లయకారుడు. అంటే గ్రేట్ డిస్ట్రాయర్ అని. శివుడి ప్రధాన కార్యనిర్వహణ లయవిన్యాసమే. అలాంటప్పుడు శివుడికి ప్రతిరూపంగా భావించే శివలింగాన్ని శృంగార భావనకు ప్రతీకగా ఎలా భావించారు? మహాశివరాత్రినాడు ఏదైతే లింగోద్భవం జరిగిందని మనం ఆరాధిస్తామో అందుకు హేతువుగా చెప్పే కథనం కూడా స్పష్టంగానే ఉంటుంది. త్రిమూర్తులలో ఆధిక్య ప్రస్తావన వచ్చినప్పుడు బ్రహ్మ విష్ణువులకు భూమ్యాకాశాలను ఏకంచేస్తూ మహాదేవుడు అత్యంత శక్తిమంతమైన జ్యోతిస్వరూప లింగంగా ఉద్భవించాడని.. దాని తుదిమొదలు తెలియక బ్రహ్మవిష్ణువులు శివలింగానికి మోకరిల్లారని చెప్తారు. లింగోద్భవ ప్రధాన కథనమే ఈ రకంగా చెప్పినప్పుడు ఇక శృంగారాత్మక ప్రతీకకు ఆస్కారమెక్కడ ఉన్నది? జనరల్‌గా మన దేవీదేవతలు, భక్తి, ఫిలాసఫీకి సంబంధించి ఎలాంటి విశ్లేషణ జరిగినా.. మౌఖిక సాహిత్యమైన వేదాలనో.. కథల రూపంలో వచ్చిన పురాణాలనో.. చరిత్ర రూపంగా వచ్చిన ఇతిహాసాలనో కోట్ చేయడం సాధారణంగా జరిగేది. కానీ.. శివలింగానికి శృంగారపరమైన ప్రతీకాత్మకత ఎక్కడా కనిపించదు.. దీనికి ఫలానా కథ.. ఫలానా పురాణం.. ఫలానా శ్లోకం దీనికి ప్రతీక అన్న భావన ప్రచారంలోకి వచ్చింది రెండున్నర వందల ఏండ్ల క్రితం బ్రిటిషోడు మన ల్యాండ్‌ను కబ్జా చేసిన తర్వాత జరిగిన పరిణామం.
హిందూయిజంలో అత్యంత వక్రీకరణకు గురైంది ఏదైనా ఉందంటే అది శివలింగం. ఏ స్థాయిలో జరిగిందంటే.. ఇదే నిజమని మనం పూర్తిగా విశ్వసించేంతగా. ఇప్పుడు దీనికి వేరే భాష్యం (ఇంటర్‌ప్రెటేషన్‌) ఇచ్చినా తోసిరాజనేంతగా వక్రీకరణ జరిగింది. 1900 సంవత్సరంలో పారిస్‌లో ప్రపంచ మత సమ్మేళనం జరిగింది. ఈ సమ్మేళనానికి స్వామి వివేకానంద హాజరయ్యారు. అదే సమ్మేళనంలో మద్రాసు నుంచి గుస్తవ్ ఒప్పర్ట్ అనే క్రైస్తవ ప్రొఫెసర్ కూడా పాల్గొన్నాడు. మద్రాస్ ప్రెసిడెన్సీ కాలేజీలో తులనాత్మక అధ్యయనశాఖలో 21 ఏండ్ల పాటు పనిచేశాడు. బ్రిటిష్ ప్రభుత్వానికి తెలుగు భాష అనువాదకుడిగా పనిచేశారు. ఇతర ద్రవిడ భాషలపై కూడా ఈయన పనిచేశాడు. ప్రభుత్వ మానుస్క్రిప్ట్ లైబ్రరీకి క్యూరేటర్‌గా కూడా వ్యవహరించాడు. రాబర్ట్ క్లాడ్‌వెల్‌తో కలిసి ద్రావిడుల ఆవిర్భావంపై పరిశోధన చేశాడు. వీరిద్దరూ కలిసి మిషనరీల కోసం పనిచేసేవారు.
వీరి రచనలన్నీ కూడా ద్రవిడ భాషలపై వ్యాఖ్యానాలే. వివరణలన్నీ కూడా విపరీతార్థాలు.. అర్థం కాని అపార్థాలతో కూడుకొన్నవే. ద్రవిడ భాషావిభాగాలను జాతిపరంగా నిర్వచించిన మేధావులు వీళ్లు. గుస్తవ్ తన రచనల్లో రాబర్ట్ క్లాడ్ మాటల్ని చాలాచోట్ల ప్రస్తావించాడు. వక్రభాష్యాలు చెప్పాడు. ద్రవిడభాషలు.. సంస్కతానికి సంబంధించి తాను అనుసరించిన విధానం సరైంది కాదని.. తర్వాతి కాలంలో తానే (గుస్తవ్) అంగీకరించాడు కూడా. తాను అనుసరించిన విధానం సరైంది కాదని ఒప్పుకొన్నాడు. ఆయా భాషలు తనకు అర్థమైన రీతిలో ఊహాజనితంగా ఒక మిథ్యా సిద్ధాంతాలను చేసుకొంటూ వచ్చానని చెప్పుకొచ్చాడు. రాబర్ట్ క్లాడ్‌వెల్ వ్యాఖ్యానాలపై తాను ఎక్కువగా ఆధారపడినట్లు చెప్పుకొచ్చాడు. కానీ సో కాల్డ్ భారతీయ చరిత్రకారులు ఈయన రచనల్లో నిజానిజాలను నిర్ధారించుకోకుండా వీటినే చారిత్రక నిజాలుగా ఫాలో అవుతూ పోయారు. వీళ్లకు ఒరిజినల్ రచనలను, ఆధారాలను చూసే ఓపికలేదు. విశ్లేషించే తీరికా లేదు. అంతకుమించి ఆసక్తి కూడా లేదు. మన చరిత్రను వక్రీకరించినవాడే గొప్పవాడు. వాడు చెప్పిందే చరిత్ర. ఈయన రచనలను తిరిగి యథాతథంగా ప్రచురించారు. కానీ.. కనీసం ఆయన ఒప్పుకొన్న నిజాలను మచ్చుకు కూడా ఆయన రచనలను పునర్ముద్రించినప్పుడు ప్రస్తావించలేదు. కనీసం అందులో ఎలాంటి కరెక్షన్స్ చేయలేదు. ఎడిటింగ్ చేయలేదు. అప్‌డేట్ కూడా చేయకుండానే వాటిని ముద్రించి సమాజం మీదకు వదిలారు. అంటేనే దాని వెనుక ఎంత కుట్ర దాగి ఉన్నదో అర్థమవుతుంది. ఈయనగారి వ్యాఖ్యానాల్లో ఒకటి శివలింగానికి సంబంధించింది. గుప్తవ్ ఒప్పర్ట్ పారిస్ కాంగ్రెస్‌లో హిందూ ధర్మానికి సంబంధించి తనదైన వ్యాఖ్యానం చేశాడు. ముఖ్యంగా సాలగ్రామ శిలపై ఒక పరిశోధనాపత్రాన్ని సమర్పించాడు. ఈయన గారి వ్యాఖ్యానం మేరకు సాలగ్రామశిల స్త్రీ యోనికి ప్రతీక అని, శివలింగం పురుషాంగమని పేర్కొన్నాడు. స్త్రీపురుష సంయోగానికి శివలింగం ప్రతీక అని సూత్రీకరించాడు. ఈయన వ్యాఖ్యానంపై సదస్సుకు హాజరైన స్వామి వివేకానంద తీవ్రంగా స్పందించారు. శివలింగం, సాలగ్రామ శిలకు సంబంధించి వాటికి సంబంధం లేని విపరీతార్థాలు తీశారని ఖండించారు. శివలింగానికి మూలం ఏమిటన్నది సోదాహరణంగా వివరించారు. అథర్వవేద సంహితలో యూప స్తుభం గురించి చర్చించింది. ఇది ఆద్యంతాలు లేనిది. అత్యంత శక్తిమంతమైనది. జగత్తుకంతటికీ ఆధారభూతమైనది.
దాన్నుంచి వెలువడే శక్తి అనంతమైనది. ఇదే శివలింగానికి ప్రతీక. ఇదే సదస్సులో మనం మహామేధావి అని కొలుస్తున్న మాక్స్ ముల్లర్ ఆర్య ద్రావిడ సిద్ధాంతాన్ని కూడా స్వామీజీ విస్పష్టంగా, సహేతుకంగా తప్పని రుజువుచేశారు. 1896 మే 28న స్వామీజీ మాక్స్ ముల్లర్ ను లండన్‌లోని ఆయన ఇంటికి వెళ్లి కలిశారు. ఆయనతో చర్చల తర్వాత ఆర్యుల సిద్ధాంతాన్ని తాను ఉపసంహరించుకుంటున్నట్లు మాక్స్ ముల్లర్ ప్రకటించాడు.
“I have declared again and again that if i say aryan, I mean neither blood nor bones, nor hair, nor skull, I mean simply those speak aryan language. To me an ethnologist who speaks of aryan race, aryan blood, aryan eyes and hair, is as great sinner as a linguist who speaks of a dolicephalic dictionary or brachycephalic grammar.”
మాక్స్ ముల్లర్ స్వయంగా వివరణ ఇచ్చిన తర్వాత కూడా భారతీయ చరిత్రలో కానీ, చరిత్రకారుల మెదళ్లలో కానీ ఆర్య ద్రావిడ సిద్దాంతం చావలేదు. దాన్ని కావాలని అదే పనిగా చర్చిస్తూ వచ్చారు. ఇదంతా ఇక్కడ అప్రస్తుతం కావచ్చు. కానీ, భారతీయ చరిత్ర, సంస్కృతి, ధర్మాలను ఎంతగా దుర్యాఖ్యానం చేశారనడానికి ఇదొక ఉదాహరణ. తాము చేసిన తప్పులను చేసిన వాళ్లు ఒప్పుకొన్నా.. వాటిని మాత్రం అదేపనిగా ప్రచారం చేసి వాటినే నిజమని నమ్మించారు. వీటిలో శివలింగాన్ని శృంగార ప్రతీకగా చెప్పటం ఈ ప్రచారానికి పరాకాష్ట.
స్వామి వివేకానంద చెప్పినట్లు శివలింగం అంటే ఆద్యంతములు లేని అసాధారణ శక్తి కలిగినదని అర్థం. అథర్వవేద సంహితలోని పదవకాండలో ఎనిమిదవ సూక్తంలో 25వ ప్రపాఠకంలో యూపస్తంభం పస్తావన ఉన్నది. ఈ స్తంభానికి ఆద్యంతాలు లేవు. నిరాకారుడైన పరమేశ్వరుడి అసాధారణ శక్తి కలిగి ఉన్నది. ఇందులోనుంచి అగ్ని (ఫైర్) విరజిమ్ముతున్నది. ఈ యూపస్తంభమే శివలింగానికి మూలమని స్వామీజీ వివరించారు. లింగము అంటే స్తంభమని అర్థం. శివలింగం అటామిక్ ఎనర్జీకి స్పష్టమైన ప్రతీక అని పరిశోధకులు సైతం తేల్చారు. దీన్నెలా నిరూపించాలి? అణు శక్తి అంతులేని వినాశనానికి గుర్తు. అదే సమయంలో అంతులేని మంచి ప్రయోజనాల కోసమూ అణుశక్తి ఉపయోగపడుతుంది. భారతీయ శాస్త్రాల ప్రకారం శివుడు ఎంత లయకారుడో.. అంత బోళాశంకరుడు. ఇవన్నీ పక్కన పెడదాం. నిజంగా శివలింగం అణుశక్తికి ప్రతీక అని ఎలా చెప్పగలం? ఒకసారి ఆధునిక యుగంలో న్యూక్లియర్ రియాక్టర్లు గమనిద్దాం.
- శివలింగం అన్నది సాధారణంగా గోళాకారంలో ఉంటుంది. న్యూక్లియర్ రియాక్టర్ కూడా అదే రూపంలో ఉంటుంది.
- పానవట్టం అన్నది శివలింగం అభిషేక జలాన్ని విడిచిపెట్టడానికి ఏర్పాటు చేసింది. న్యూక్లియర్ రియాక్టర్ బేస్ కూడా కలుషిత నీటిని వదిలిపెట్టడానికి ఏర్పాటుచేస్తారు.
- ప్రాచీన కాలం నుంచి ఇవాల్టి వరకూ కూడా శివలింగానికి ప్రతిరోజూ నీరు, పాలతో అభిషేకంచేస్తారు. ఇవాళ మనం న్యూక్లియర్ రియాక్టర్ చల్లబడటానికి దాని పై భాగంలో నీరు పోస్తాం.
- ఆసక్తికరమైన విషయమేంటంటే శివాలయాలు అత్యధికంగా నదులు, సరస్సులు, చెరువుల వంటి నీటివనరులు ఎక్కువగా ఉన్నచోటనే ఉంటాయి. న్యూక్లియర్ పవర్ ప్లాంట్లు కూడా నీటి వనరులు ఉన్నచోటనే ఉంటాయి.
- శివలింగానికి అభిషేకం చేసిన జలాన్ని తీర్థ ప్రసాదంగా స్వీకరించరు. న్యూక్లియర్ రియాక్టర్‌ను చల్లబరిచేందుకు పోసే నీటిని కూడా రేడియేషన్ ప్రభావం ఉన్న కలుషిత నీటిగా వదిలిపెడతారు.
ఇదే విషయంలో మరో ఆలోచననూ గమనిద్దాం. త్రిమూర్తి తత్త్వం మన భారతీయ ధర్మంలో ఉన్నది. బ్రహ్మ, విష్ణువు, మహేశ్వరుడు ముగ్గురూ త్రిమూర్తులు. ఇంతవరకు అంతా మనకు తెలిసిందే. ఇక్కడ విష్ణువు పాలసముద్రంలో శేషశయనుడై ఉన్నాడు. ఆయన నాభిలోంచి వచ్చిన కమలంపై బ్రహ్మ ఉంటాడు. వీరిద్దరికీ డిటాచ్డ్ (విడిగా)గా శివుడు నిరంతర ధ్యానముద్రలో ఉన్నాడు. ఈ కాన్సెప్ట్‌ను కూడా మనం అధ్యయనం చేయాలి. అణుశక్తి అన్నది ప్రోటాన్లు, ఎలక్ట్రాన్లు, న్యూట్రాన్ల కారణంగా ఉద్భవిస్తుంది. పరమాణు కేంద్రకంలో ప్రోటాన్లు న్యూట్రాన్లు ఉంటాయి. ఈ కేంద్రకం ఆధారభూమికగా ఎలక్ట్రాన్లు తిరుగుతుంటాయి. కణాల సృష్టిలో ప్రధానమైన భూమిక ప్రోటాన్లు, ఎలక్ట్రాన్లదే. అందులోనూ ఎలక్ట్రాన్లదే ఎక్కువ పాత్ర. త్రిమూర్తి తత్వంలోనూ బ్రహ్మ బాధ్యత అదే. ఎలక్ట్రాన్లు తమ దశ మార్చుకుంటే కేంద్రక విచ్ఛిత్తి జరుగుతుంది. అంటే సృష్టి లయ తప్పితే మహావినాశనం జరుగుతుంది. ఇక్కడ విష్ణువు నాభి కేంద్రకమైతే, హరుడు న్యూట్రాన్, హరి ప్రోటాన్ అయితే బ్రహ్మ ఎలక్ట్రాన్ అన్నమాట.
ఇక్కడ మరో ముచ్చట కూడా చెప్పుకోవాలి. అణుశక్తిని ఎంతగా సద్వినియోగం చేసుకుంటే అంత మేలుచేస్తుంది. దుర్వినియోగం చేసుకుంటే మహావినాశనానికి దారితీస్తుంది. దీనికి సంబంధించి కూడా మనకు భారతీయ పురాణాల్లో కథల రూపంలో హెచ్చరించారు మన పూర్వికులు. భస్మాసురుడు కనాకష్టం పడి శివుణ్ణి మెప్పిస్తే ఆయన కనికరించి తన పవర్‌లో చిన్న పర్సంటేజిని ఇచ్చాడు. దాన్ని అతడు దుర్వినియోగం చేస్తే తానే భస్మమైపోయాడు. శివుడిలోని అణుశక్తికి ఇంతకంటే మంచి ఉదాహరణ ఇంకేంకావాలి.
కైలాసంపై ఏమున్నది?
కైలాస పర్వతం శివుడి ఆవాసం. పశ్చిమ టిబెట్లో దాదాపు 22 వేల అడుగుల నిలువెత్తు పర్వతం. భారతీయులతోపాటు, బౌద్ధులు, జైనులు కూడా ఆధ్యాత్మికంగా పవిత్రమైనదిగా భావిస్తారు. పరమశివుడు ఇక్కడ కొలువై ఉన్నాడని అందరి విశ్వాసం. అత్యంత ప్రతికూల వాతావరణంలో, ఆక్సిజన్ తక్కువగా ఉన్న ప్రాంతంలో ఉన్న కైలాస పర్వతం దగ్గరకు ఒక్కసారైనా వెళ్లిరావాలని ప్రతి భారతీయుడు కోరుకుంటాడు. ఏటా లక్షలాది భక్తులు కైలాస మానససరోవర యాత్ర చేస్తుంటారు. ఆధునిక శాస్త్రవేత్తలు మాత్రం శివుడు లేదా గ్రహాంతరవాసులు ఇతర లోకాల నుంచి రకరకాల పరికరాలను భూమ్మీదకు తీసుకువచ్చేందుకు ఈ పర్వతాన్ని వినియోగించుకొన్నారని భావిస్తారు. కానీ దీని శిఖరంపైన ఏమున్నదనేది ఇప్పటికీ ఎవరికీ అంతుపట్టని రహస్యమే. విచిత్రమేమంటే ఈ పర్వతం ఒకవైపు నుంచి చూస్తే శంఖాకారంలో, మరోవైపు నుంచి చూస్తే పిరమిడ్ ఆకారంలో కనిపిస్తుంది. ఎర్న్‌స్ట్ ముల్దషేవ్ అనే ఓ రష్యా కంటి సర్జన్.. ప్రపంచంలోని మారుమూల ప్రాంతాల్లోని 21 పర్వతాలను అధిరోహించారు. 1999లో కైలాస పర్వత స్వరూప స్వభావాలను అధ్యయనం చేయడానికి వెళ్లారు. ఆయన వెంట కొందరు రష్యా శాస్త్రవేత్తలు కూడా వెళ్లారు. కైలాస పర్వత శిఖరం వారికి ఒక పిరమిడ్‌లా కనిపించింది. ఆ శిఖరం ఎవరో రూపొందిస్తే రూపొందిందే తప్ప సహజంగా ఏర్పడింది కాదని వారు అభిప్రాయపడ్డారు. వారి దృష్టిలో గ్రహాంతర వాసులు దీని శిఖరం పై ఒక నిర్మాణాన్ని చేసుకున్నారని నమ్మారు. అలాగైతే అదే శివుడి ఆవాసమా? కైలాస శిఖరంపై కృత్రిమ నిర్మాణం నిజంగానే ఉన్నదా? ఆ రహస్యం మాత్రం తేలలేదు. అనేక మతాలు కైలాస పర్వతాన్ని పూజనీయంగా భావిస్తాయి. దాని అంచుల్లో అడుగులు వేయడం కూడా ఘోరమైన పాపంగా భావిస్తారు. ఎవరైనా సాహసం చేస్తే వారు చనిపోతారని కూడా చెప్తారు. అందుకే చైనా కైలాస పర్వతారోహణను నిషేధించింది. అయితే కైలాస యాత్రకు వెళ్లిన చాలామందికి అనూహ్యమైన అనుభవాలు కలిగాయి. చాలామందికి వయసు పెరిగిపోయింది. వెంట్రుకలు, గోళ్లు సాధారణంకంటే వేగంగా పెరిగాయి. కైలాసపర్వతంపై నుంచి వచ్చే ఎనర్జీ యాత్రికుల శరీరాల్లో ప్రవేశించడం వల్ల మార్పులు జరుగుతున్నాయి. కైలాస శిఖరంపై ఎనర్జీ ఉన్నదని ఆస్ట్రోనాట్ సిద్ధాంతకర్తలు చెప్తారు. కైలాస పర్వతమే రేడియోయాక్టివ్ కావచ్చు. శివుడిలోని హాలాహలం అంటే ఇదేనా? అంటే అవుననే చెప్పాలి. ఇందుకు మరింత ఆధారం కోసం అన్వేషిస్తే.. మరిన్ని వివరాలు లభ్యమయ్యాయి. కైలాస పర్వతానికి సుమారు 600 మైళ్ల దూరంలో పశ్చిమచైనా ప్రాంతంలోని మొగావో గుహల్లో క్రీస్తు పూర్వం 500 నుంచి క్రీస్తుశకం 1500 మధ్యకాలంలో దాదాపు 50 వేల మాన్యుస్క్రిప్ట్లను బౌద్ధులు దాచి ఉంచారు. 1907లో హంగేరియన్ పరిశోధకుడు ఆరెల్ స్టెయిన్ కనుగొనేంత వరకు వీటి గురించి ప్రపంచానికి తెలియలేదు. ఈ పత్రాలలో ఒక అద్భుతమైన డయాగ్రమ్ లభించింది. ఈ డయాగ్రమ్‌ని చూస్తే ఇది అత్యంత సాంకేతికపరమైనదిగా కనిపించింది. ఈ డయాగ్రమ్‍ను పరిశీలిస్తే అదొక కణత్వరణ యంత్రం (పార్టికల్ ఆక్సెలరేటర్)గా అభిప్రాయపడ్డారు. ఇది న్యూక్లియర్ రియాక్టర్‌కు శక్తిని ఇచ్చేది. మహా ప్రళయం సంభవించినప్పుడు న్యూక్లియర్ టెక్నాలజీని ఉంచడానికి కైలాస పర్వతాన్ని సరైన ప్రదేశంగా గ్రహాంతరవాసులు భావించారని ఆస్ట్రోనాట్ సిద్ధాంతకర్తలంటారు. శివుడే పరమ శక్తి అయినప్పుడు.. అది కైలాసంలో ఉంచక మరెక్కడ ఉంటుంది. కైలాస పర్వతం చాలా అద్భుతమైందని శాస్త్రవేత్తలే రూఢీ చేశారు. కైలాస పర్వతం పూర్తిగా రేడియేషన్‌తో నిండి ఉన్నదని తేల్చారు. రేడియేషన్ అంటే పాయిజన్.. అంటే విషం. శివుడి పరిభాషలో చెప్పాలంటే హాలాహలం. భూమిపై అత్యంత ప్రాచీన నాగరికతకు, అణ్వస్త్ర శక్తికి ఇంతకంటే ఆనవాళ్లు ఇంకేం కావాలి. ఈ శక్తిని మానవాళికి గ్రహాంతరవాసులు అందించారని పాశ్చాత్యశాస్త్రవేత్తలు అంటారు. పరమేశ్వరుడి ప్రత్యక్ష్య సాక్ష్యం మనకిక్కడ సాకారంగా కనిపిస్తున్నది. మన లభించిన ప్రాచీన శాస్త్ర విజ్ఞానానికి ఆయనే ప్రతినిధి. మనకు గురువు. మార్గదర్శి. సర్వస్వం. కైలాస పర్వతానికి సంబంధించి మరో అంశాన్ని కూడా లోతుగా పరిశీలించాల్సిన అవసరం ఉంది. రష్యాకు చెందిన నోబెల్ శాంతి బహుమతి గ్రహీత నికోలస్ రోరిచ్ హిమాలయాల అన్వేషణలో వెళ్లినప్పుడు ఆయనకు సూర్యకాంతితో వెలుగులీనుతూ ఒక భారీ యూఎఫ్‌ఓ ఆకాశంలో వెళ్తూ కనిపించిందిట. ఇది దక్షిణం నుంచి ఆగ్నేయం వైపు దారి మళ్లుతూ ఆకాశంలో మాయమైపోయిందని రోరిచ్ పేర్కొన్నారు. కైలాస యాత్రకు వెళ్లే చాలా మందికి యూఎఫ్‌ఓ‌లను చూసిన అనుభవం ఉన్నది. వీటిలో చాలావరకు కైలాస పర్వతం సమీపంలోకి వెళ్లి మాయమైపోయాయి. కైలాస పర్వతం రేడియోయాక్టివ్ కనుకనే దానిపై సురక్షితంగా చేరడానికి యూఎఫ్‌ఓలు తిరుగుతున్నాయనడానికి సంకేతంగా భావించవచ్చని ఆస్ట్రోనాట్ సిద్ధాంతకర్తలు చెప్తున్నారు. అంటే కైలాసంపై శివుడి ఉనికి స్పష్టమని తేలిపోయింది. ఎందుకంటే శివుడు శక్తికి ఆధారమే కాదు. తానే పరమోత్కృష్టమైన శక్తి.
త్రినేత్రం.. త్రిశూలం
శివుడు త్రినేత్రుడు.. ధరించే ఆయుధం త్రిశూలం. త్రిమూర్తులలో మూడోవాడు. శివుడికి మూడు అంకెకు ఉన్న సంబంధం ఏమిటి? మూడులోని రహస్యచైతన్యం ఏమిటి? భారతదేశంలోనే కాదు.. ప్రపంచంలోని అనేక సంస్కృతుల్లో ఈ మూడు అనే అంకె విపరీతంగా ప్రభావితం చేస్తున్నది. భారతీయ ధర్మంలో త్రిమూర్తులు ఎలా ఉన్నారో.. శ్రీ.. వాణి.. గిరిజలు ముగురమ్మలుగా ఉన్నారు. మనకున్న దేవతల సంఖ్య కూడా ముక్కోటి. శ్రీచక్రం అనేక త్రికోణాల సమాహారమే. మన ఆధ్యాత్మిక భావభూమికల్లో మూడు అంకెకు అత్యంత ప్రాధాన్యం ఉన్నది. మూడు తర్వాత మనం చెప్పుకొనేవి కూడా మూడు గుణాకార సంఖ్యలనే చెప్పుకొంటాం. రెండు మూడులు గుణిస్తే షణ్ముఖుడు కన్పిస్తాడు. మూడు మూడులు గుణిస్తే.. నవ దుర్గలు, నవవిధ బ్రహ్మలు, నవనాథులు ఉంటారు. నాలుగు మూడులు గుణిస్తే ద్వాదశ జ్యోతిర్లింగాలున్నాయి. అయిదు మూడులు గుణిస్తే కృష్ణ, శుక్ల పక్షాలు.. ఆరు మూడులు గుణిస్తే అష్టాదశ శక్తిపీఠాలు.. ఏడు మూడులు గుణిస్తే ఏకవింశతి. వినాయకుడిని ఏకవింశతి పత్రాలతో పూజిస్తారు. ఎనిమిది మూడులు గుణిస్తే చతుర్వింశతి.. గాయత్రి మంత్రంలోని అక్షరాలు 24. మనకు 24 మంది ప్రధాన ఋషులు ఉన్నారు.
మన సారస్వతంలో ప్రధానమైన కావ్య గుణాలు 24. తొమ్మిది మూడులు గుణిస్తే సప్తవింశతి. మనకు ఉన్న నక్షత్రాలు 27. మనకు ఉన్న పలు విధాలైన యోగాలు 27. విశ్వదేవులు 27. మండపములు 27. మీరే ఒక్కసారి ఆలోచించండి.. మనం పెట్టుకొనే నామాలు మూడు. త్రిశూలమే త్రినామాలు. మనం ఆలయంలో తీసుకొనే తీర్థు మూడుసార్లు తీసుకొంటాం. ప్రదక్షిణ మూడుసార్లు చేస్తాం. ఆచమనం మూడుసార్లు చేస్తాం. యజ్ఞోపవీతం మూడు లేదా ఆరు వరుసలు వేస్తారు. మనం చేసే నమస్కార ముద్ర త్రికోణాకారంలో ఉంటుంది. ప్రేమ చిహ్నమూ త్రికోణమే. ఏమిటీ మూడుకున్న ప్రాధాన్యం? మన వ్రతాల్లో, పూజల్లో, యజ్ఞయాగాదుల్లో పసుపుతో తయారుచేసే గౌరీ రూపానిదీ త్రికోణమే. ఋగ్వేదంలో మనకు దేవతల స్వరూపాలను విశ్లేషించారు. వారి సంఖ్యను పేర్కొన్నారు. పన్నెండుగురు ఆదిత్యులు.. పదకొండు రుద్రులు.. ఎనిమిది మంది వసువులు.. 31 మంది.. వీరికి ద్యావాపృథువులిద్దరినీ కలిపితే.. 33 మంది దేవతలయ్యారు. ఇక్కడ కూడా ఇదే ప్రాధాన్యం.
ఈ మూడు అంకెకున్న ప్రాధాన్యం అసాధారణమైంది. కేవలం భారతీయ ధర్మానికే ఇది పరిమితం కాలేదు. ప్రపంచంలోని అన్ని సంప్రదాయాల్లోనూ ఈ మూడుకు అత్యధిక ప్రాధాన్యమున్నది. మానవ చరిత్ర మొత్తాన్ని ఒక్కసారి పరికిస్తే అత్యున్నతమైనవన్నీ మూడు రూపాలలో వచ్చినట్లు తెలుస్తుంది. ఈ అంకె మరో ప్రపంచానికి మార్గదర్శనం చేస్తున్నట్లుగా ప్రతీకాత్మకంగా కనిపిస్తుంది. భూమికి, మరో ప్రపంచానికి ఒక గేట్ వే గా మూడు అంకే ప్రాతినిధ్యం వహిస్తున్నది. మతంలో, ధర్మంలో మూడు అంకె కీలకమైన భూమిక పోషిస్తున్నది. ఎందుకంటే.. ప్రపంచంలో కోట్లాది ప్రజలు భూమి మీదకు ఇతర గ్రహాల నుంచి.. లేదా ఇతర లోకాల నుంచి జీవులు లేదా దేవతలు.. సైంటిఫిక్‌గా చెప్పాలంటే గ్రహాంతరవాసులు వచ్చి వెళ్లారని బలంగా విశ్వసిస్తున్నారు. బౌద్ధం త్రిశరణాలను బోధించింది. హిందూ త్రిమూర్తి తత్వం మాదిరిగానే క్రైస్తవం త్రిమూర్తి తత్త్వాన్ని బోధించింది. తండ్రి, కుమారుడు, పరిశుద్ధాత్మ అన్న మూడు తత్త్వాలు ఏకమై త్రిమూర్తి తత్త్వంగా కనిపిస్తున్నాయి. ఇక్కడ తండ్రి అంటే యహెూవా, కుమారుడు అంటే ఏసుక్రీస్తు, పరిశుద్ధాత్మ అంటే దేవుడి ఆత్మ భూమి నుంచి నీరు మూడురోజుల పాటు వేరయిందని ప్రాచీన బైబిల్ చెప్పింది. ఏసుక్రీస్తు శిలువ వేయబడిన తర్వాత మూడురోజులకు తిరిగి జీవితుడయ్యాడని న్యూటెస్టిమెంట్ చెప్తుంది. మనదేశంలో షిర్డీ సాయిబాబా కూడా శరీరాన్ని విడిచిపెట్టి మూడురోజుల తర్వాత మళ్లీ ప్రవేశించాడని చరిత్ర చెప్తుంది. యూదుల సంప్రదాయంలోనూ త్రి తత్వాలున్నాయని చెప్తారు.
ప్రపంచంలోని అనేక ప్రాంతాల్లోనూ మూడుకున్న ప్రాధాన్యం శిలాసదృశంగా కనిపిస్తుంది. ఐర్లాండ్‌లోని న్యూట్రేంజిలో ఐదువేల ఏండ్లనాటి ఓ సమాధి మూడు రకాల దారులు కలిగి ఉన్నది. ప్రాచీన గ్రీసులోని పదకొండు వందల ఏండ్లనాటి మూడు బౌద్ద ఆరామాలు మూడు పగోడాలుగా ప్రసిద్ధి చెందాయి. ఇవి కూడా త్రికోణాకారంలో ఏర్పడి ఉన్నాయి. ప్రకృతి విపత్తుల నుంచి మనుషులను రక్షించేందుకు ఈ రూపంలో నిర్మించారని ప్రజల విశ్వాసం. ప్రపంచంలోని అనేక సంస్కృతులు మూడు అనే అంకే అత్యంత పవిత్రమైనదిగా, దైవ సంబంధమైనదిగా భావిస్తాయి. యురోపియన్ సంప్రదాయంలో మూడు అంకె వినియోగం విస్మతంగా కన్పిస్తుంది. ఈ అంకెల సంప్రదాయాలు చాలా శక్తిమంతమైనవి. అంతేకాదు.. వివిధ సంస్కృతుల మధ్య ఒక కనెక్టివిటీని ఏర్పాటు చేశాయనటంలో సందేహం లేదు. ఇంతెందుకు మన జీవితమే భూతభవిష్యత్ వర్తమానాలుగా మూడు విభాగాలుగా విభజించుకొన్నాం. జానపదాల్లో, ఆధ్యాత్మిక గ్రంథాల్లో మూడో అంకె అధికంగా కనిపిస్తుంది.
అన్నింటికంటే ముఖ్యమైనవి ఈజిప్టులోని గిజా పిరమిడ్లు. కైరో నగర శివార్లలో నిర్మాణమైన మూడు అతి పెద్ద పిరమిడ్లు నాలుగువేల సంవత్సరాలకు పూర్వం నిర్మించినవి. ప్రపంచంలోని ఏడు వింతల్లో ఇవి ఒకటి. ఈ మూడు పిరమిడ్లు త్రికోణాకృతిలోనే నిర్మించారు. ఆనాటి పిరమిడ్ నిర్మాతలకు జియోమెట్రీ గురించి బాగా తెలుసు. ఒకదాని పక్కన ఒక భవనాన్ని ఎలా నిర్మించాలన్న నాలెడ్జి వారికి చాలా ఉన్నది. గిజా పిరమిడ్ నిర్మాణమే అత్యంత ఆసక్తిగా కనిపిస్తుంది. మూడువైపులా కనిపించే ముక్కోణపు ఆకారం మన ప్రాచీనులు జియోమెట్రీ నాలెడ్జితో ఇంటిగ్రేట్ అయ్యారని స్పష్టంచేస్తుంది. ఈ ముక్కోణం ఊర్థ్వముఖంగా దూసుకుపోతున్నట్లు కనిపిస్తుంది. ఇది దేనికి సంకేతం.. ఇతర లోకాల్లో ఉన్న దేవుళ్లకు భూమి నుంచి సందేశాన్ని పంపించేందుకు ఏర్పాటుచేసిందా? ఊర్థ్వముఖంగా సాగిపోతున్న చైతన్య స్రవంతికి సింబలా?
క్రీస్తుపూర్వం ఆరో శతాబ్దం.. ప్రముఖ గ్రీకు గణిత శాస్త్రవేత్త, తత్వవేత్త పైథాగరస్ ఒక ప్రముఖమైన సిద్ధాంతాన్ని ప్రతిపాదించాడు. ఏ స్క్వేర్డ్ ప్లస్ బీ స్క్వేర్డ్ = సీ స్క్వేర్డ్. లంబకోణ త్రికోణంలోని మూడు వైపుల మధ్య సంబంధాన్ని ఈ గణితశాస్త్ర ఫార్ములా బోధిస్తుంది. పైథాగరస్ రెండున్నర వేల సంవత్సరాల క్రితం జీవించాడు. ఈయన ఈజిప్టుకు చెందిన గొప్ప ఉపాధ్యాయుల దగ్గర చదువుకున్నాడని చెప్తారు. అంటే ఈజిప్టు జ్ఞానాన్ని పైథాగరస్ గ్రీకుకు తీసుకువచ్చాడన్నమాట. ఒక పైథాగరస్‌కు మాత్రమే కాదు.. ప్రపంచంలోని ప్రాచీన తత్త్వవేత్తలందరికీ గణితశాస్త్రమనేది సూపరనేచురల్‌కు సంబంధించిన రహస్యాన్ని విప్పిచెప్పే అద్భుతమైందని విశ్వసించారు. విశ్వంలో ప్రతి ఒక్కటీ మూడు భాగాల నిర్మాణమని పైథాగరస్ చెప్పాడు. ప్రతి ఒక్క సమస్య కూడా డయాగ్రమెటిక్‌గా త్రికోణ పరిమితిలోకి వస్తాయన్నాడు. పైథాగరస్ శిష్యులు త్రికోణాన్ని ఊర్థ్యముఖానికి ప్రతినిధిగా నమ్ముతారు. ఇప్పటివరకు అంతుపట్టని అనేక రహస్యాలకు మూడు అత్యంత కీలకమైన అంకే అని చెప్తారు.
ఫ్రాన్స్‌లోని కార్నాక్.. ఈ ప్రాంతంలో వేల సంఖ్యలో భారీగా నిలుచున్న రాళ్ళున్నాయి. ఆరువేల సంవత్సరాలకు పూర్వమైనవి. వీటిలో ఎక్కువగా పైథాగరస్ త్రికోణమితి మాదిరిగా ఉంటాయి. ఇవన్నీ కూడా పైథాగరస్‌కు ఎన్నో వేల ఏండ్లకు పూర్వం ఏర్పాటుచేసినవి. స్టోన్ హెంజ్, అవెబ్యురీ ప్రాంతాల్లో కూడా ఇవే రకమైన నిలువురాళ్లు కనిపిస్తాయి. పైథాగరస్ సిద్ధాంతం గ్రహాంతరవాసులకు సంబంధించిన జియోమెట్రిని ప్రతిబింబిస్తున్నదనేది ఆస్ట్రోనాట్ శాస్త్రవేత్తల అభిప్రాయం. త్రికోణమైనా.. త్రిశూలమైనా.. త్రినామమైనా.. విశ్వ రహస్యాన్ని ఛేదించే ఉపకరణం. దేవతలు.. లేదా గ్రహాంతర వాసులకు.. మనుషులకు మధ్య ఉన్న సంబంధానికి ప్రతీక. 17వ శతాబ్దంలో ప్రఖ్యాత భౌతిక శాస్త్రవేత్త సర్ ఐజాక్ న్యూటన్ చలనగతికి సంబంధించి మూడు సూత్రాలు ప్రకటించాడు. ఈ సూత్రాల ప్రకారం కూడా అన్ని శక్తులు రెండుగా ఉంటాయి. గురుత్వాకర్షణ శక్తికి వ్యతిరేక దిశలో మిగతా శక్తుల చలనం ఉంటుంది. ఇందుకు ఉదాహరణగా రాకెట్‌ను తీసుకోవచ్చు. ఊర్థ్వముఖంగా పయనించే చైతన్య ప్రసారమే త్రికోణం. ఈ త్రికోణంలో ఊర్థ్వముఖంలోని శిఖరం మహాశివుడు. మిగతా రెండు కోణాలు బ్రహ్మ విష్ణులు. ఈ మూడు దైవ శక్తులు ఒకదానిపై ఒకటి ఆధారభూతాలు. వినాశనం లేకుండా సృష్టి జరుగదు. దాన్ని నిర్వహించడం సాధ్యం కాదు. ఈ వినాశనానికి ఆధారమైన శక్తి మహాదేవుడు. ఆయన చేతిలో త్రిశూలం ఉన్నది. ఆయన భృకుటిలో త్రినేత్రం ఉన్నది. ఇవి రెండూ ఊర్థ్వముఖంగా ఉంటాయి. మానవ శరీరంలో ఇడ, పింగళ, సుషుమ్న నాడులు శివుడి త్రిశూలానికి ప్రతీకలు. కుండలిని యోగసాధన ద్వారా మనలోని జీవచైతన్య ప్రసారం ఊర్థ్వముఖంగా సుషుమ్న ద్వారానే జరుగుతుంది. ఈ సుషుమ్న త్రికోణంలోని శిఖరం. ఆ శిఖరం పేరు ఈశ్వరుడు. పరమేశ్వరుడు. త్రినేత్రం విషయంలో ఒక చర్చ చాలా కాలంగా జరుగుతున్నది. మన మేధస్సులోని పీనియల్ గ్లాండ్ త్రినేత్రానికి ప్రతీకగా చెప్తారు. పీనియల్ గ్లాండ్ మనలోని చైతన్యానికి.. అస్తిత్వ వికాసానికి ప్రతీక. చీకటిలోంచి వెలుతురు ప్రసరించినట్లు.. ఈ గ్లాండ్ నుంచి శరీరంలోని అన్ని భాగాలకు కాంతి ప్రసారం జరుగుతుంది. శివుడి మూడో కన్ను నుంచి కూడా అనంతమైన కాంతి ప్రసారం సమస్త విశ్వాన్ని భస్మరాశిగా మారుస్తుంది. మన శరీరంలో అన్నమయ, ప్రాణమయ, మనోమయ కోశాలు మూడున్నాయి. ఈ మూడు జీవశక్తికి అత్యంత ప్రధానమైనవి. ప్రాణమయానికి అధిదేవత శివుడు. ప్రాణం నుంచే సమస్త ప్రాణులూ పుడుతున్నాయి. ప్రాణముచేతనే జీవితం సాగిస్తున్నాయి. చివరకు ఆ ప్రాణంలోనే మరణిస్తున్నాయి. ఈ జీవశక్తిలోని ప్రాధాన్యానికి కూడా మూడు అంకే కీలకం కావడం విశేషం. పై లోకాలలో ఉన్న శివుడు భూమ్మీద ఉన్న మనుషులకు సర్వం తానే అయి నిలిచాడు. నిలుస్తున్నాడు. మన నమస్కారంలోని త్రికోణమితి ఆ ఈశ్వరుడి కోసమే. పిరమిడ్‌లోని త్రికోణం ఆ దేవదేవుడికి పంపించే సందేశమే. ఊర్థ్వలోకాలకు భూమి నుంచి జరిగే చైతన్య ప్రసారానికి మూడు ఒక ప్రతీక. అందుకు మనకు ప్రతిఫలం ఆ ఈశ్వరుడి నుంచి లభిస్తున్నది. మనకు అక్షరం ఆయన. ఆహారం ఆయన. ఆభరణం ఆయన. ఔషధం ఆయన. ఆనందం ఆయన.
***
వేదాలు రఫ్‌గా నాలుగువేల సంవత్సరాలకు పూర్వం రాశారని పాశ్చాత్య శాస్త్రవేత్తలు నమ్ముతారు. భారతీయులు మాత్రం తమ ధర్మానికి ప్రథమ విజ్ఞాన శాస్త్రాలుగా భావిస్తారు. వేల సంవత్సరాల నుంచి వేదాలు ఉన్నాయి. మౌఖికంగా ఒక తరం నుంచి మరో తరానికి వేద విజ్ఞానం బదిలీ అవుతూ వచ్చింది. ఈ విజ్ఞానం ప్రకారం ఆధునిక మానవుల ఉనికికి ముందు భూమ్మీద ఇతర లోకాల నుంచి అడుగు పెట్టిన దేవుడు శివుడే. ఎవరీ శివుడు. ప్రపంచంలోని అనేక సంస్కృతుల్లో ఎన్కి, ఓడిన్, జ్యూస్, విరాకోచ, క్వెట్జాల్‌కోటి, కుకుల్కాన్ వంటి దైవరూపాలు ఉన్నాయి. ఈ రూపాలన్నీ కూడా.. ఆయా సంప్రదాయాల్లో సృష్టిలయలకు అధిష్ఠానదేవతలుగా కొలుస్తారు. ఈ శివుడే.. ఆయా సంస్కృతుల్లోని దేవతల రూపాలా? అంటే అవుననే ఖగోళ శాస్త్రవేత్తలు చెప్తున్నారు. బైబిల్ సంబంధమైన సంప్రదాయాలు ప్రారంభం కావడానికి వేల ఏండ్లనాడే మానవుడి సముద్ధరణకు దిగివచ్చిన ఈశ్వరుడు మహాదేవుడు. ఆధునిక సృష్టికి ముందు ప్రళయాన్ని సృష్టించిన లయకారుడు ఈశ్వరుడు. ఈ ప్రళయం అన్న మాట కేవలం భారతీయ ధర్మానికే పరిమితం కాలేదు. ప్రపంచవ్యాప్తంగా ఉన్న అన్ని సంస్కృతులు, ధర్మాలు.. అన్ని రకాలైన ప్రాచీన రచనలు, డాక్యుమెంట్లు.. మౌఖిక సాహిత్యం అన్నింటిలోనూ ఏదో ఒక విధంగా ప్రళయం (కొందరు గ్రేట్ ఫ్లడ్ అన్నారు) ప్రస్తావన.. చర్చ ఉన్నది. ఈ ప్రళయం అన్నది మహా శక్తిమంతమైనదని ఒకే ఒక్కరోజులో ఈ ప్రళయం భూమిని తుడిచిపెట్టేస్తుందని చెప్పినవే. భారతీయ ధర్మం ప్రకారం శివుడు చేసిందీ.. చేస్తున్నదీ.. చేసేదీ ఇదే. టిబెటన్ లామాల బోధనల ప్రకారం ప్రళయం లేదా గ్రేట్ ఫ్లడ్ ద్వారా భూమి అంతా జలసమాధిలో మునిగిపోతుంది. కొంతకాలానికి నీరు పూర్తిగా తగ్గిపోయిన తర్వాత తిరిగి జీవజాల సృష్టికి శివుడు బీజం వేస్తాడు. శివుడు కాస్మిక్ పవర్. ఆధునిక మానవ జీవనానికి పైలోకాల నుంచి దిగివచ్చిన దివ్య పురుషుడు. ప్రాచీన ఆస్ట్రోనాట్ థియరిస్టులు కూడా ఈ అభిప్రాయాన్ని ధ్రువీకరిస్తున్నారు.
ప్రళయం
పునఃసృష్టికి ముందు లయకారుడైన శివుడు ప్రళయాన్ని సృష్టిస్తాడు. ఆ ప్రళయానికి సమస్త విశ్వం జలసమాధి అవుతుంది. ప్రళయం రావటం అనేది నిజమేనా? దీనికి ఆధారాలు ఏమున్నాయి? ఒకవేళ ప్రళయం వస్తే అది శివుడి వల్లనే జరిగిందా? అట్లాంటిస్ మహానగరం ఎలా మునిగిపోయింది? ద్వారక సముద్రగర్భంలో ఎలా కలిసిపోయింది? ఇదంతా మహాదేవుడి వల్లనే అయిందా? మెసపటోమియా నాగరికత అంతమైపోవడానికి ప్రళయమే కారణమా? పునఃసృష్టి చేయడానికి ప్రస్తుత సృష్టి అంతం కావలసిందేనా? దీన్ని భారతీయ గ్రంథాలే చెప్తున్నాయా? లేక ఇతర సంప్రదాయాల్లో కూడా ఉన్నాయా? లోతుగా పరిశీలిస్తే చాలా విషయాలు వెలుగుచూస్తున్నాయి. భారతీయ గ్రంథాల్లో మహాదేవుడు మహా ప్రళయాన్ని సృష్టించినప్పుడు సముద్రంలో వటపత్రశాయి మాత్రం మిగిలి ఉంటాడట. అబ్రహం లేదా ఇబ్రహీం ధర్మావలంబులు నోవాను విశ్వసిస్తారు. దేవుడు మహాప్రళయాన్ని సృష్టించినప్పుడు నోవా ఒక పడవను తీసుకొని వచ్చి మంచి మనుషులను రక్షిస్తాడట. ఇస్లాం, క్రిస్టియన్ సంప్రదాయాలు ఈ అంశాన్ని బలంగా విశ్వసిస్తాయి. కొన్ని సంప్రదాయాల్లో మానవ ప్రపంచాన్ని శిక్షించడానికి దేవుడు ప్రళయాన్ని సృష్టిస్తాడని చెప్తారు. దేవుడి చట్టాలను ఉల్లంఘించినప్పుడు ఈ మహా విధ్వంసం సంభవిస్తుందంటారు. మనం మహాదేవుడిని ప్రళయకారుడిగా విశ్వసిస్తాం. ప్రపంచ వ్యాప్తంగా సుమారు 1200 సంస్కృతులు ప్రళయం వచ్చిందని.. వస్తుందని నమ్ముతున్నాయి. ప్రముఖ గ్రీకు తత్వవేత్త ప్లేటో రచనల్లో ఈ ప్రళయాన్ని గ్రీకు దేవుడు జ్యూస్ సృష్టించాడని పేర్కొన్నాడు. ఈ దేవుడి చేతిలోనూ త్రిశూలం వంటి ఆయుధం ఉంటుంది. ఇతను అపరిమితమైన విద్యుత్ శక్తికి అంటే ఫైర్‌కు అధిదేవత. ఈయనే శివుడా.. శివుడే ఈయనా? వేర్వేరు సంప్రదాయాల్లో పేర్కొన్న దేవుళ్లు శివుడికి ప్రత్యామ్నాయ రూపాలేనా? అని అంటే అవుననే చెప్పాలి. ఇన్ని సంప్రదాయాల్లో ప్రచారంలో ఉన్న కథనాలు కేవలం ఊహించి రాసినవి కావని చాలా మంది ఆంత్రోపాలజిస్టులు చెప్తారు. ఇవన్నీ ఏదో ఒకచోట సంభవించిన దానిని బట్టే వచ్చినవని వారి బలమైన విశ్వాసం.
ప్రళయం నిజంగా సంభవించిందా? లేదా? మహాదేవుడి మహావినాశనానికి పాల్పడ్డాడా? లేదా? అన్న అంశాన్ని తేల్చడానికి ప్రపంచవ్యాప్తంగా అనేక పరిశోధనలు జరిగాయి. హెూలోక్ ఇంపాక్ట్ (అత్యంత నూతన యుగం)పై పరిశోధించడానికి ఐదుగురు శాస్త్రవేత్తలు హిందూ మహాసముద్రంలో శోధన మొదలుపెట్టారు. వేల సంవత్సరాలకు ముందు భూమిపై పెద్ద సంఖ్యలో ఆస్టరాయిడ్ దాడి జరిగిందని కనుగొన్నారు. ఆ ఆస్టరాయిడ్ దాడులతో అసంఖ్యాకంగా సునామీలు వచ్చి భూమిపై నాగరికతల నాశనానికి కారణమయ్యాయని అభిప్రాయపడ్డారు. ఈ మహా ఆస్టరాయిడ్ దాడి మెడగాస్కర్ దీవికి పశ్చిమం వైపు హిందూ మహాసముద్ర గర్భంలో 18 మైళ్ల వెడల్పు ఉన్న ఒక అతి భారీ బిలాన్ని ఈ శాస్త్రవేత్తలు కనుగొన్నారు. అంతేకాదు మెడగాస్కర్, ఆస్ట్రేలియా మధ్యన పెద్దసంఖ్యలో శిలాజాలు, అవక్షేపాలు వీరికి కనిపించాయి. సముద్రగర్భంలో జలజీవులే కాకుండా ఇతర జీవుల శిలాజాలు కూడా ఉన్నాయి. ఇవన్నీ కూడా అత్యధిక వేడిమి కలిగిన రాయి ద్రవీభవనం చెందింది. ఇలాంటి శిలాజాలు ప్రపంచంలోని చాలా ప్రాంతాల్లో మనకు కనిపిస్తాయి. బొలీవియా దేశంలోని పుమాపును దేవాలయ ప్రాంగణంలో ఇలాంటి శిలాజాలే మనకు దర్శనమిస్తాయి. వేల సంవత్సరాల క్రితం మహాదేవుడు చేసిన కాస్మిక్ వార్ కారణంగా సంభవించిన ప్రళయం వల్లనే ఇదంతా జరిగిందని హెూలోసిక్ ఇంపాక్ట్ శాస్త్రవేత్తలు చెప్తారు. దేవతలు మానవ సమాజంపై పెద్ద సంఖ్యలో జరిపిన బాంబర్లు (ఆస్టరాయిడ్స్) కురిపించారని దానివల్ల వచ్చిన ప్రళయానికి డైనోసార్ల జాతి నాశనమైందని శాస్త్రవేత్తలు నిరూపిస్తున్నారు. ఒక్కొక్క ఆస్టరాయిడ్ కనీసం ఎనిమిది మైళ్ల విస్తీర్ణమున్న అతి పెద్దది. దీని శక్తి హిరోషిమాలో జరిగిన అణ్వస్త్ర శక్తికంటే అయిదు బిలియన్ రెట్లు ఎక్కువ. బైబిల్ కూడా ప్రళయం అనేది 40 రోజులు, 40 రాత్రులు కొనసాగుతుందని చెప్తుంది. ప్రళయానికి ముందు ఆస్టరాయిడ్ల ద్వారా పెద్ద ఎత్తున అగ్నిజ్వాలలు రేగుతాయని, ప్రపంచమంతా బూడిద కమ్ముకుంటుందని హెూలోసిక్ ఇంపాక్ట్ శాస్త్రవేత్తలు పేర్కొంటున్నారు.
బెల్జియంలోని మెల్ పట్టణంలో ఆండ్ర్యూ కోలిన్స్, మరో పురాతత్వ శాస్త్రవేత్త ఫెర్దీ గీర్ట్స్ ఒక అంతుపట్టని నల్లని భూమి పొరను కనుగొన్నారు. స్థానిక మైనింగ్ కంపెనీకి చెందిన భూభాగంలో జరిపిన తవ్వకాల్లో మూడు నాలుగు అడుగుల లోతున ఈ నల్లని భూమి పొర కనిపించింది. కోలిన్స్, గీర్ట్స్ దీనిపై మరింత లోతుగా పరిశోధన చేశారు. ఆ తర్వాత ఈ భూమిపొర ఐసేజ్ ముగిసిన కాలం నాటిదని నిర్ధారించారు. సుమారు 13వేల సంవత్సరాలకు పూర్వమైనదిగా భావించారు. డచ్‌లోని యుస్సెల్ హారిజాన్ లేయర్‌ను ఇక్కడి నల్లని భూమిపోలి ఉన్నది. గీర్ట్స్ కథనం ప్రకారం వేల ఏండ్ల క్రితం సంభవించిన భారీ జలవిపత్తు వల్లనే ఈ భూమి ఇలా మారిపోయింది. ఇంత పెద్ద విలయాన్ని నిస్సందేహంగా ఇతరలోకాల నుంచి ఎవరో చేశారని ఈ ఇద్దరు పరిశోధకులు చెప్పారు. ఈ విలయకారుడిని మనవాళ్లు మహాదేవుడిగా గుర్తించారు. త్రిమూర్తి తత్వంలో మూడో తత్వంగా ఈ లయ విన్యాసాన్ని గుర్తెరిగారు.
2014 అక్టోబర్లో అమెరికాలోని మేరీలాండ్లో అంతర్జాతీయ ఆస్టరాయిడ్ ఇంపాక్ట్ వర్క్‌షాప్ జరిగింది. ప్రపంచవ్యాప్తంగా ప్రముఖ శాస్త్రవేత్తలంతా హాజరయ్యారు. ఈ వర్క్‌షాప్ మొత్తం ఆధునిక పరిజ్ఞానం ప్రకారం ఆస్టరాయిడ్లు ఢీకొనడం.. వాటి వేగ తీవ్రతను చర్చించడంపై ప్రధానంగా దృష్టి సారించింది. ఒక ఆస్టరాయిడ్ వేగం ఏకే-47 బుల్లెట్ కంటే 9రెట్లు ఎక్కువగా ఉంటుందని చెప్పారు.
ఇక మన దేశానికి వద్దాం. పశ్చిమాన అరేబియా సముద్రతీరంలో కాంబే ద్వీపకల్పం ఉన్నది. గుజరాత్ రాష్ట్రంలోని కాంబే సుమారు 200 కిలోమీటర్ల విస్తీర్ణంలో త్రికోణాకృతిలో ఉంటుంది. ఈ ప్రాంతంలో శాస్త్రవేత్తలు ఇటీవలి కాలంలో పరిశోధనలు ప్రారంభించారు. భూ ఉపరితలానికి 125 అడుగుల లోపల అసాధారణ రీతిలో ప్రాచీన నాగరికత ఆనవాళ్లు కనుగొన్నారు. శాస్త్రవేత్తలు ఈ ప్రాంతంలో రెండు నగరాలను కనుగొన్నారు. ఈ నగరాలకు సంబంధించిన పరిశోధనలు ఇంకా కొనసాగుతున్నాయి. భూమిపై అసాధారణ భౌగోళిక మార్పు సంభవించిన సమయంలో ఈ నగరాలు విధ్వంసం అయి ఉండవచ్చని వీరు భావిస్తున్నారు. ఈ నగరాలు కనీసం తొమ్మిదివేల సంవత్సరాలకు పూర్వమైనవేనని నిర్ధారిస్తున్నారు. ఈ నగరాలు ఒకప్పుడు జరిగిందని భావిస్తున్న ప్రళయ ప్రభావానికి గురైనవేనా? అన్నది ఆస్ట్రోనాట్ శాస్త్రవేత్తలు నమ్ముతున్నారు. ఇంతెందుకు ప్రపంచంలో అతి గొప్ప నాగరికత కలిగిన తొలి నగరంగా ప్రసిద్ధి చెందిన అట్లాంటిస్ క్రీస్తుకు పూర్వం 9600 సంవత్సరాలకు పూర్వం ఉన్న ఈ మహానగరం ప్రళయం కారణంగా ధ్వంసం అయింది. చివరి ఐసేజ్ అనంతరం కలిగిన ప్రకృతి విపత్తే మహా ప్రళయం.
వీటన్నింటినీ గమనిస్తే.. మానవ నాగరికత వేల ఏండ్ల నాడే మహా ప్రళయం వల్ల నాశనమైందని తెలుస్తుంది. సుమారు పదివేల సంవత్సరాల క్రితం వరకు మళ్లీ మానవ నాగరిక సమాజాలు అభివృద్ధి చెందేంతవరకు భూమిపై ఏమీ లేదనే భావించాలి. ఇప్పటికీ మనం సునామీల ప్రభావాన్ని, మహా మానవ హననాన్ని కండ్లారా చూస్తున్నాం. ఈ లయ విన్యాసానికి అధినాయకుడే మహాదేవుడు. లయకారుడు. సృష్టి నిర్వహణ కార్యాన్ని విజయవంతంగా నిర్వహిస్తున్నవాడు.
శివుడు అసత్యం కాదు. మిథ్య ఎంతమాత్రం కాదు. అన్నింటికీ మించిన నిజం. మహాప్రళయానంతరం మానవులకు, నాగరికత వికాసానికి గొప్ప మార్గం చూపించిన ఈశ్వరుడు. బొమ్మలో.. దేవాలయాల్లోని గోడలపై శిల్పాలో లేక ఆధ్యాత్మిక గ్రంథాలు అబద్ధం చెప్పవచ్చేమో.. కానీ అసాధారణమైన శక్తి… దాన్ని వినియోగించుకునే సామర్థ్యాన్ని పెంచుకుంటున్న మానవజాతి.. నక్షత్రాలవైపు సాగుతున్న మన ప్రయాణాలు అబద్ధం చెప్పవు కదా.. ఓం నమః శివాయ.